> Zurück

Radunonza da commembers 2017

Valentin Vincenz 08.01.2018

Naven dallas 18 e mesa seradunan ver 40 participonts agl aperitif annual ella sala polivalenta en casa da scola. Allas 19 entscheiva la radunonza generala. Quella cuozza entuorn treis quarts d'ura. Tuttas propostas e proposiziuns dalla suprastonza vegnan acceptadas unanimamein, numnadamein il quen annual (cun in carschen dalla facultad da 50%), il budget 2018, las novas statutas e la fixaziun dalla contribuziun annuala da 40 francs per tuts commembers (affons entochen 18 onns ein hosps).  

Erich Streiff vegn elegius unanimamein en suprastonza sco successur da Marcus Dietrich. Nus engraziein agl Erich Streiff per siu grond engaschi per "Pro Andiast" entochen uss e per la promtadad dad entrar en suprastonza.

Ursi dat cumiau al suprastont demissiunont Marcus Dietrich - in cordial engraziament al Marcus per sia gronda lavur ella suprastonza dapi la fundaziun dall'uniun.

Il "Premi Pro Andiast" va agl Ignaz (Nazi) Alig.  Marcus Dietrich surdat agl undrau il premi per siu grond engaschi en las uniuns ed autoritads dil vitg d'Andiast.  

Suenter la part ufficiala vein nus gudiu, sco adina, la buna cuschina dil Guido dil Postigliun sco era la purschida da salata e dessert da nossas commembras - in cordial engraziament allas dunnas. E naturalmein ha era la bubronda adattada buca muncau.

Sascha Tischhauser ha incantau nus cun ses versets satirics e leghers sin moda fetg speciala e bein reussida. Nus essan stai da cumpignia entochen mesanotg - ina ga dapli ina fetg biala sera en ambient amicabel.  

Per la suprastonza:   Jürg Kuhn, president